.فواد خان کی 8 سال بعد بالی ووڈ انڈسٹری میں واپسی
پاکستانی اداکار فواد خان، جو 2014 میں فلم ’خوبصورت‘ سے بالی ووڈ میں اپنی موجودگی کا بھرپور احساس دلا چکے ہیں، 8 سال بعد بھارتی فلم انڈسٹری میں دوبارہ قدم رکھنے جا رہے ہیں۔فواد خان، جو پاکستان کے نمایاں اداکاروں میں شمار ہوتے ہیں، نے اپنی شاندار اداکاری سے پاکستانی ڈراموں اور فلموں میں خاصی شہرت حاصل کی ہے۔ بالی ووڈ میں اپنی قسمت آزمائی کرتے ہوئے، انہوں نے وہاں بھی بڑی مقبولیت حاصل کی۔
2014 میں بالی ووڈ فلم ’خوبصورت‘ میں فواد خان نے اداکارہ سونم کپور کے ساتھ مرکزی کردار ادا کیا۔ اس فلم میں ان کی اداکاری کو بے حد سراہا گیا۔ اس کے بعد، فواد نے بالی ووڈ فلموں ‘کپور اینڈ سنز’ اور ‘اے دل ہے مشکل’ میں بھی اپنی اداکاری کے جوہر دکھائے۔ ان فلموں کی بدولت بھارت میں ان کے مداحوں کی تعداد میں نمایاں اضافہ ہوا، جہاں نہ صرف ان کی اداکاری بلکہ ان کی دلکش شخصیت نے بھی لوگوں کے دل جیت لیے۔
تاہم، پاکستان اور بھارت کے درمیان بڑھتی ہوئی سیاسی کشیدگی کے نتیجے میں پاکستانی فنکاروں کے بالی ووڈ میں کام کرنے پر پابندی عائد کر دی گئی تھی۔ اس کے باوجود، بھارتی مداح فواد خان کو دوبارہ بڑے پردے پر دیکھنے کے منتظر تھے۔بھارتی میڈیا کے مطابق، فواد خان بہت جلد بالی ووڈ اداکارہ وانی کپور کے ساتھ ایک نئی فلم میں نظر آئیں گے۔رپورٹس کے مطابق، فواد خان اور وانی کپور کی نئی فلم کی پروڈکشن کا آغاز جلد ہونے والا ہے، اور اس وقت یہ فلم پری پروڈکشن کے مراحل میں ہے۔ فلم کی شوٹنگ لندن میں شروع ہونے کی توقع ہے، تاہم اس بارے میں مزید تفصیلات ابھی تک سامنے نہیں آئیں۔
