پرچون فروش اسلام آباد، کراچی، لاہور، کوئٹہ اور پشاور کے تاجر رجسٹریشن کرائیں گے،یکم جولائی سے ٹیکس وصولی ہوگی
اسلام آباد(ہم عوام) آئی ایم ایف کے مطالبے پر ایف بی آر نے 6بڑے شہروں میں یکم اپریل سے تاجر دوست سکیم کی رجسٹریشن کے آغاز کا اعلان کر دیا، پرچون فروش یکم اپریل سے اسلام آباد، کراچی، لاہور، کوئٹہ اور پشاور کے تاجر رجسٹریشن کرانا شروع کریں گے اور ان سے یکم جولائی 2024 سے ٹیکس وصولی شروع ہوگی۔ ایف بی آرآن لائن مارکیٹ پلیس پلیٹ فارم کو اس اسکیم کے تحت ٹیکس نیٹ میں شامل کرے گی۔ ایف بی آر کی جانب سے جاری ہونے والے ایس آر او میں چھوٹے تاجروں اور دکانداروں کیلئے خصوصی طریقہ کار تجویز کیا گیا ہے۔تاجر دوست اسکیم کے تحت ہر تاجر اور دکاندار کوآرڈیننس کی شق 181 کے تحت رجسٹریشن کیلئے درخواست کرنا ہوگی اور یہ 30 اپریل تک ٹیکس آسان ایپ کے ذریعے کی جا سکتی ہے۔سالانہ ایڈوانس ٹیکس اگر صفر ہو تو ایسے شخص کو سالانہ 1200 روپے ادا کرنا ہوں گے لیکن اگر کسی وجہ سے کسی شخص کی آمدن ٹیکس سے مستثنیٰ ہے تو اس پر یہ لاگو نہیں ہوگا، اگر کوئی شخص اپنا ایڈوانس ٹیکس اکٹھا ادا کر دے یا بیلنس ادا کر دے تو اس کے مجموعی ایڈوانس ٹیکس کو 25 فیصد کم کر دیا جائے گا۔خیال رہے کہ ایف بی آر نے دو ماہ قبل تاجروں کو ٹیکس نیٹ میں لانے کیلئے تاجر دوست سکیم فائنل کی تھی۔ ایف بی آر نے سکیم پر عمل درآمد کیلئے تاجروں کی رجسٹریشن کی غرض سے ’تاجردوست‘ موبائل ایپ تیار کی تھی۔ موبائل ایپ کے تحت ٹیکس نیٹ سے باہر تاجروں کو تاجر دوست ایپ کے ذریعے رجسٹرڈ کیا جائے گا۔اس ایپ کے ذریعے دکان داروں کی آمدن کا ریکارڈ ایف بی آرکو موصول ہوگا۔ دکان داروں پر سالانہ آمدن کے مطابق ٹیکس عائد ہوگا جسے ماہانہ وصول کیا جائے گا۔دکان کے سائز اور سالانہ آمدن پر ٹیکس عائد کیا جائیگا جو ماہانہ بنیاد پر جمع ہوگا۔ ذرائع کے مطابق اسکیم کے تحت تمام شعبوں سے منسلک کاروباروں اور افراد پرٹیکس عائد کیا جائیگا۔
