تعلیم ، تعلیمی نظام اور تعلیمی ادارے سوسائٹی پر کنڑول حاصل کرنے کے لیے ریاست کے بنیادی آلات ہیں .ریاست ان کی تشکیل اپنے مفادات اور مقاصد کے مطابق کرتی ہے جبکہ ریاست کے مفادات اور مقاصد سوسائٹی کے طاقتور طبقات کے مفادات اور مقاصد کے مطابق ہوتے ہیں .ان تعلیمی اداروں کے ذریعے ریاست عوام کے اذہان کے ساتھ انکے اجسام پر بھی کنٹرول حاصل کرتی ہے .عوام الناس کو ایک مخصوص نظم و ضبط کے اندر تربیت دیتے ہوئے ان سے ریاستی مفادات کے مطابق پیداواری آلے کا کام لیا جاتا ہے _ جہاں ہر فرد بظاہر آزادی سے مگر ایک خود کار مشین کی طرح ریاست کے لیے بہت کم قیمت پر پیداواری فرائض سر انجام دیتا ہے _ یوں وہ ریاست کے توسط سے بالا دست طبقات کے لیے پیداواری خدمات کا ایک آلہ بن جاتا ہے _سٹوڈنٹس یونین پر پابندی سے ریاست ناصرف متذکرہ مفادات حاصل کر رہی ہے بلکہ وہ اس جبر کی قیمت بھی عوام سے ہی وصول کر رہی ہے _ تعلیمی سالوں میں بے مقصد اضافے، غیر ضروری مضامین سے طلبہ پر اضافی بوجھ۔ ، ہر ادارے کا من مانا ڈریس کوڈ و بہت سے دیگر عوامل تعلیمی اخراجات میں بے پناہ اضافہ کی وجہ ہیں ، سرکار کی طرف سے تعلیمی بجٹ کا کل قومی آمدن کا معمولی سا حصہ مختص کیا جاتا ہے جس کی وجہ سے کمزور غریب طبقات تیزی سے وسائل میں حصّہ داری سے محروم ہو رہے ہیں، یونیورسٹی کالجز اور سکولوں کا تدریسی اور غیر تدریسی عملہ چھوٹی چھوٹی ریاستیں بنا کر بیٹھا ہے جہاں سرکاری اور عوامی پیسے سے ذاتی دولت میں اضافہ کیا جارہا ہے _ طالبات کا جنسی استحصال معمول بن چکا ہے _ اس جیسے درجنوں مسائل کے پیدا ہونے کی وجہ طلبہ یونینوں پر پابندی ہے-
طلبہ یونین اس ریاستی جبر کے مقابلے میں عوام کے پاس ایک دفاعی ہتھیار ہے _ یونین سازی عوام میں طلبہ کے گروہ کو یہ موقع فراہم کرتی ہے کہ وہ ریاست کے مفادات اور مقاصد کو عوام الناس کے مفادات اور مقاصد سے ہم آہنگ کر سکیں- اگر ریاست کے نزدیک واقعتاً کسی قسم کے قومی مقصد کا تعین کرنا ضروری ہے تو لازم ہے اس کا اختیار عوام کے پاس ہونا چاہیے -پارلیمنٹ کے بعد طلباء یونین اس کام کے لیے موزوں ترین ادارہ ہے – جس کا حجم پارلیمنٹ سے بھی وسیع ہے –
پاکستان کی تاریخ میں قیام پاکستان اور جمہوریت کے قیام کے لیے طلباء کا کردار تاریخی اور لازوال رہا ہے – حب تک طلباء کو .ملکی سیاست میں کردار ادا کرنے کا موقع ملتا رہا حکمران اشرافیہ کو اپنی من مرضی کے فیصلے نافذ کرنے میں مشکلات پیش آتی رہیں –
طلباء کے اسی کردار کے پیش نظر 1984 میں فوجی ڈکٹیٹر ضیا الحق نے طلباءیونین پرپابندی لگائی تھی .جس کے پیچھے جمہور دشمن سوچ کارفرما تھی -صوبہ سندھ میں تو یہ پابندی 1979 میں ہی لگا دی گئ -جس کے لیے اس وقت کے گورنر سندھ لیفٹینینٹ جنرل ایس ایم عباسی نے ضیا الحق کو تجویز پیش کی تھی -ان کا مؤقف تھا کہ طلباء حکومتی رٹ کو قائم کرنے میں بہت بڑی رکٰاوٹ ہیں ,بعد ازاں جب انیس سو چوراسی میں طلباء یونین کو پورے ملک میں بین کیا گیا اس کے متعلق بھی یہ تاثر عام تھا کہ افغانستان میں امریکی کردار کا راستہ صاف کرنے کے لیے امرہکہ کے کہنے پر یونین پر پابندی لگائی گئ ہے اور اس کے بدلے میں ایف 16 جنگی جہازوں کا تحفہ پاکستان کو ملا – ان دومثالوں سے طلباء ہونین کی اہمیت سمجھی جا سکتی ہے –
اس آمرانہ حکومت کے خاتمے کے بعد جب شہید بے نظیر بھٹو کی جمہوری حکومت قائم ہوئ تو انہوں نے 1989 میں اس حکم کو ختم کرکے طلباء یونین کے الیکشن منعقد کروائے. بدقسمتی سے محترمہ کی حکومت 1990 میں ختم کردی گئ -جس کے بعد طلباء یونین پر غیر اعلانیہ پابندی لگا دی گئ. جمعیت طلبہ اسلام جو جماعت اسلامی کا طلباء ونگ ہے اس کو فریق بنا کر سپریم کورٹ میں ایک رٹ دائر کی گئ اور 1993میں ایک دفعہ پھر سپریم کورٹ کے حکم سے یہ پابندی دوبارہ لگا دی گئ -, طلباء یونین پر پابندی کے حوالے سے اسلامی جمعیت طلباء جو جماعت اسلامی کا ونگ ہے کا کردار بہت اہم رہا – یہ پابندی تعلیمی اداروں میں تشدد کے بڑھتے رحجان کو جواز بنا کر لگائ گئ تھی -اس تشدد کی ذمہ دار سراسر جمعیت تھی -, جمعیت نے ہی تعلیمی اداروں میں تشدد کو فروغ دیا جس کے لیے اسے ریاستی سرپرستی میسر تھی – اس بات کے ثبوت کے لئے یہ حقیقت کافی ہے کہ اس پابندی کے نتیجے میں تمام ترقی پسند جماعتیں ختم ہوگئیں لیکن جمعیت کا کنٹرول ملک بھر کی تمام یونیورسٹییز میں مضبوط ہو گیا – دوہزار اٹھارہ سے ترقی پسند طلباء تنظیمیں ملک بھر میں طلباء یونین کی بحالی کے لیے احتجاج کررہی ہیں لیکن جمعیت أس پرامن احتجاج کو لڑائی جھگڑے سے متازعہ بنادیتی ہے –
طلباء اورسٹوڈنٹس یونین کی اہمیت کو پیش نظر شہید بھٹو نے پیپلز پارٹی کی سیاست میں اسے مرکزی کردار دیا – طلباء کو مضبوط بنانے کے لیے وزیر اعظم بھٹو نے تعلیم کے لیے میڈیکل کالجز اور یونیورسٹیوں کا پورے ملک میں جال بچھا دیا جہاں مفت تعلیم دی جاتی -بنیادی تعلیم سے لے کر یونیورسٹی کی اعلی تعلیم تک مفت مہیا کی – طلباء کے سفر میں سہولت کے لیے ہر قسم کی ِٹرانسپورٹ چاہے وہ بس ہو ٹرین یا ہوائ جہاز آدھا کرایہ معاف کردیا – اُس زمانے کے بے شمار لوگ چاہے پیپلز پارٹی کے مخالف ہی کیوں نا ہوں برملا تسلیم کرتے ہیں کہ بھٹو کی انہی پالیسیز کی وجہ سے وہ تعلیم حاصل کر سکے –
جبکہ آج کل تعلیم کے شعبے کو باقاعدہ کاروبار کی شکل دے دی گئ ہے – جہاں غریب طبقے کی اکثریت کی رسائی ممکن ہی نہیں -یوں آہستہ آہستہ ایک بڑا طبقہ ترقی کے مواقع حاصل کرنے سے محروم ہو رہا ہے اور ریاستی وسائل صرف خوشحال طبقے تک محدود ہو رہے ہیں
پاکستان پیپلز پارٹی عوامی حقوق کے لیے اپنی جدوجہد میں طلباء کی طاقت کو شامل کرنے کے لیے ہمیشہ کوشش کرتی رہی ہے – 2008 میں جب پیپلز پارٹی کی حکومت قائم ہوئ تو اس وقت کے وزیراعظم سید یوسف رضا گیلانی نے اپنی پہلی تقریر میں طلباء یونین کو بحال کرنے کا وعدہ کیا – بدقسمتی سے حکومت کو اس کے لیے جمہوری طاقتوں کی حمایت میسر نہ آسکی – پارلیمنٹ میں اتحادیوں کے سہارے قائم حکومت اتنی اکثریت نہیں رکھتی تھی کہ اپنے فیصلے پر اکیلی ہی عملدرآمد کر سکے – 2011 میں اٹھارویں ترمیم کے بعد طلباء یونین بحالی کا اختیار صوبوں کے پاس چلا گیا -یہ ترمیم بہت سے سٹیک ہولڈرز کے لیے قابل قبول نہیں تھی -یوں یونین بحالی کی منزل اور دور ہوتی گئ – 2017 میں پیپلز پارٹی کی سندھ حکومت نے ایک دفعہ پھر یونین بحالی کی کوشش کی باقاعدہ اعلان کر دیا لیکن یہ کوشش بھئ ناکام رہی –
آخر کار 9فروری 2022کو پیپلز پارٹی سندھ کی حد تک طلباء یونین کو بحال کرنے میں کامیاب ہوگئ -یہ بحالی باقاعدہ قانون سازی سے عمل میں آئ اور یہ بل سندھ اسمبلی سے متفقہ طور پر منظور ہوا –
طلباء یونین کی بحالی میں ترقی پسند طلباء تنظیموں کی جدوجہد کو نظر انداز کرنا زیادتی ہوگا – بائیں بازو کی یہ تنظیمیں دو ہزار اٹھارہ سے احتجاج میں مصروف ہیں – ہر سال نو فروری کو ایک ہی دن یہ احتجاج پورے ملک میں کیا جاتا ہے – اب تک اس احتجاج کا دائرہ 53 شہروں تک پھیل چکا ہے. رواں سال بھی لاہور میں طلباء نے احتجاجی کیمپ لگائے- سندھ میں طلباء یونین کی بحالی کے بعد یہ منزل قدرے نزدیک محسوس ہو رہی ہے –
پنجاب کے طلباء کو اس ضمن میں زیادہ متحرک ہونے کی ضرورت ہے کیونکہ تعلیمی مافیا پنجاب میں ہی سب سے زیادہ مضبوط ہے .
